Ugandans urged to embrace their traditional culture for peaceful living
Abantu nibashabwa kugaruzaho eby’obuhangwa ngu obundi kikaretaho obuteeka omunsi.
Ebi bigambirwe omushunganisa w’ebyobutegyeki omu office ya Mukuru w’eihanga rya Uganda, Omwami Robert Rwakandare obu abeire nagamba n’abantu abeetabiire omwishaazi ry’obuhangwa eribeire ahari Kan house omuri Kazo town council omu disiturikiti eya Kazo ah’eizooba ry’orwakana esabiiti egyi.
Entekateka y’eishaazi eri, ebeire etebekanisibwe Radio eya Kazo FM hamwe n’abegyesa b’ebyobuhangwa kandi ekaba nekuratira ekitekateko ky’omushomesa w’ebyobuhangwa Kuruga omuri Bunyoro orikumanywa nka Living Nuwagaba.
Nuwagaba agiizire ngu eki nakikora ahabwokwenda ngu abantu bamanyane kandi bagarireho eby’obuhangwa.
Eishaazi eri ryetabirwemu abebembezi baingi ba Kazo nka omukyara omunyishegyero ahabwa disiturikiti ya Kazo Hon. Jennifer Muheesi, ishenteko w’entebe ya Katano Rev Samuel Mugisha Katungunda, Mukuru wekibiina Kya NRM ahabwa Kazo, Omwami Wilson Nkaija nabandi bebembezi ahandengo zoona kandi aba barugireyo bahagira enkora egi ngu neyija kuretaho emicwe hamwe n’emitwarize mirungi omu bantu.
Eishaazi eri habiremu okwevuga okukozirwe Edward Kakiziba, okwegyesa okukozirwe abahanuzi abarimu Peninah Rugumba, Tandeka Kaito, Jackson Rwekishokye, Keith Bunanukye, George Bashaija hamwe n’abandi baingi abagambire ahabuhangwa okubushemereire kutwazibwa batyo bakubukuratira kureetaho obusingye omu eihanga ryeitu erya Uganda.
