Asiimwe naraaza minisita Tumwebaze atagwejegyeire
Origyire kusingwa omukaruru k’okukwata ebendera ya NRM ahantebbe y’obunyeishengyero ahabw’ishaza rya Kibale East omu disiturikiti ya Kamwenge, Asiimwe Chripas Mugisha ahamizegye ngu tihariho obu arikwija kuruga omukaururu aka kurekureira owakwatsire ebendera y’ekibiina kandi ori omunyeishengyero w’ishaza eri, Hon. Frank Tumwebaze, hoona nabwo ori Minister w’ebyobuhingi n’oburiisa.
Ebingambo bya Mugisha nibyeijaho bwanyima y’orukiiko orurugyire kubaho omuri disiturikiti egi ahangati y’abebembezi ba NRM abarimu omuhwezi wa mukuru w’ishengyero, Rt. Hon. Thomas Tayebwa hamwe nabakwatsire ebendera n’abarikwenda kwetsimba nkabanyamwegyendaho. Ekigyendererwa ky’orukiiko oru kibeire kiri ekyokugarikanisa abantu aba boona kugyira ngu nabarikwenda kwetsimba nkabanyamwegyendaho bashagikye abeine ebendera ya NRM ahabwobumwe bw’ekibiina.
Bamwe omubabeire nibenda kwetsimba nkabateine bibiina ebibarikurugamu barigyire omukaururu aka kuhagyira aba NRM. Asiimwe Chripas Mugisha orikwenda entebbe ahamizegye ngu tarikwija kuruga omukaruru aka. Nagira ngu neija kugumizamu ayetsimbire nkoteine kibiina ahabwokuba abantu ba Kibale East tibarikwenda kufayo ahabibiina beitu ngu nibenda obuhereza.
