Babiri bayoherezibwa ahari rimanda
Kooti y’idara ry’okubanza omu disiturikiti eya Kazo eyaaba okurirwe omuramuzi Joshua Ndazano, yatsindika omushaija wemyaka 45 aha rimanda ahabwa omushango gw’okuteera omuntu.
Kooti yahurira ngu ahabiro 19/10/2025, Abaho Yoram , omutaka w’ekyaaro ekya Rushamaitu omugomborora ya Burunga, disiturikiti ya Kazo akateera kandi yahutaaza John Tumwijukye.
Ari omumaisho g’omuramuzi tiyikiriza mushango nikwo omuramuzi kumugira ngu nayikirizibwa kushaba okwemererwa baitu yamusindika aha rimanda omukihome kya Rugongi omu disiturikiti ya Kiruhura kuhitsya ebiro 25/11/2025.
Hoona kooti niyo emwe yatsindika aha rimanda omutsigazi w’emyaaka 25 y’obukuru ahabw’omushango gw’okwiiba akasimu kakapeesha hamwe n’esente by’omukaikuru w’emyaaka 65.
Kanyankore Justus Kyapadoora yasindikwa omukihome kya Rugongi omu disiturikiti ya Kiruhura ahabwokugira ngu ahabiro 26/8/2025 akeiba esimu hamwe na sente zirikwingana emitwaaro makumi abiri (200,000) ebyabaire biri ebyomukaikuru Kekibira Annet owa Rwamanuuma, Obwengara ward Kazo Town council, Kazo District.
Omuramuzi Ndazano, yasindika Kanyankore omukihome kuhitsya ebiro 25/11/2025 kuba nibwo yagaruka omu court kugaruka kushomeerwa omushango gwe.
